RUMOR VARIUS
Anno 2002 - fasciculum 144
.
Nuntius citatissimus
Mavors in villa apparet.
Abit. Administer rerum domesticarum indignatus est
A sinistris praefectus titubans per scaenam transit.
Gallinae gracillant. A sinistris accedit Caesar Runcina.
Administer rerum domesticarum init in villam.
A dextris praefectus titubans trans scaenam prodit.
In ianua villae apparent Rea, Tullius Rotundus, Zeno, Mavors, Sulphurides atque Phosphoridos camerarii.
Rea lente venit ad Aemilianum.
Digito monstrat Caesarem Runcinam.
Omnes oculis emissiciis Ream aspectant spe imbuti.
Puella virum aspectat horrore perfusa
Rea obtemperat.
Caesar Runcina commotus est.
Oboriuntur fumi volumina ingentia.
Zeno et duo camerarii se consistunt more militari.
Fumus dilabitur, in ianua medius inter aulicos apparet Romulus, post eum Achilles et Pyramus, qui gerit corbem planum. Silentium
Index verborum rariorum recentiorumve
Comoediae pars 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13
Romulus Magnus* (Pars 6)
.
*Friderici Dürrenmatt (1921-1990) Helvetii narratoris et comoediographi ingeniosi Romulus Magnus (Romulus der Grosse) comoedia historica fidei historicae contraria quattuor actibus scripta, anno 1948 primum acta, annis 1958 et 1964 retractata, anno 2000 a Nicolao Gross Germano Coreanensi in Latinum conversa.
Nuntius citatissimus
Germani in Via Appia incedunt versus meridiem! Germani in Via Appia incedunt versus meridiem!
Tullius Rotundus:
Videtis. Versus meridiem. Iter faciunt in nos ipsos. Vix locuti eramus de nuntiis atris, denuo talem accepimus.
Mavors in villa apparet.
Mavors:
Navem actuariam longe lateque non inveni.
Tullius Rotundus:
At aliqua est in portu Neapolitano.
Mavors:
Quae transnavigavit ad Germanos.
Tullius Rotundus:
O caelum, mariscalce imperialis, nave egemus!
Mavors:
Conabor invenire naviculam piscatoriam.
Abit. Administer rerum domesticarum indignatus est
Tullius Rotundus:
Vah omnia paravimus ad Imperium e Sicilia denuo constituendum, in animo habemus reformationes sociales et assecurationem invaliditatis operariis portuensibus offerendam. At vae nunc omnia vacillant, quia deest navis!
A sinistris praefectus titubans per scaenam transit.
Spurius:
Phy foetent res adustae. Numquam desinunt foetere. Ardent oculi.
Gallinae gracillant. A sinistris accedit Caesar Runcina.
Caesar Runcina:
Mei Domini. Spero vos lento pectore cognovisse Roma cum perierit, Imperium valere ne tittibilicium quidem. Cum Imperium Romanum decoxisset, tum proelio devicta est; suo Marte non iam se servare potest.
Aemilianus:
Quis es tu?
Caesar Runcina:
Sum Caesar Runcina, possessor negotiationis mundanae Runcinariae.
Aemilianus:
Quid vis?
Caesar Runcina:
Omni viro politico haud prorsus inepto sole clarius est Romam non posse servari nisi ego nonnullos miliones sestertium erogavero. Cum rem obtulerim sincerissime, postulo, ut mihi decenter respondeatur. Aut vultis aut non vultis. Aut mundus triumphabit aut peribit. Aut ego sponsam ducam in domum meam aut Imperium collabetur
Aemilianus:
Quid hic luditur, administer rerum domesticarum?
Tullius Rotundus:
Odoacer assensus est pretio decem milionum exercitum suum ex Italia deducere. Hic - fabricator bracarum - paratus est ad hanc summam solvendam.
Aemilianus:
Qua condicione?
Tullius Rotundus:
Cupit Ream principissam in matrimonium ducere.
Aemilianus:
Arcesse principissam.
Tullius Rotundus:
Sentin’ -
Aemilianus:
Et fac aulici congregentur.
Administer rerum domesticarum init in villam.
Aemilianus:
Faciam ut tuae oblationi respondeatur, fabricator bracarum.
A dextris praefectus titubans trans scaenam prodit.
Spurius:
Per centum horas non dormivi. Centum horas. Sum fatigatus, tam fatigatus sum, ut concidam.
In ianua villae apparent Rea, Tullius Rotundus, Zeno, Mavors, Sulphurides atque Phosphoridos camerarii.
Rea:
Me advocare iussisti, Aemiliane?
Aemilianus:
Veni ad me.
Rea lente venit ad Aemilianum.
Aemilianus:
Per tres annos me exspectavisti, filia Imperatoris.
Rea:
Per tres annos, diem de die, noctem de nocte, horam de hora.
Aemilianus:
Tu amas me.
Rea:
Te amo.
Aemilianus:
Totan’ anima tua?
Rea:
Tota anima mea.
Aemilianus:
Omnian’ facies, quae a te postulavero?
Rea:
Omnia faciam.
Aemilianus:
Cultrumne quoque capies?
Rea:
Cultrum capiam, si tu volueris.
Aemilianus:
Tamne inauditus est amor tuus, filia Imperatoris?
Rea:
Amor meus tui est immensus. Te non recognosco, sed te amo. Te timeo, sed te amo quoque.
Aemilianus:
Ergo nube huic nitido semicupae eidemque pare liberos.
Digito monstrat Caesarem Runcinam.
Zeno Isaurus:
En tandem occidentalem Romanum, qui est mente sana!
Aulici:
Nube, principissa,nube!
Tullius Rotundus:
Age puella, da hoc beneficium patriae carissimae!
Omnes oculis emissiciis Ream aspectant spe imbuti.
Rea:
Tene derelinquam?
Aemilianus:
Debes me derelinquere.
Rea:
Aliumne amem?
Aemilianus:
Debes amare eum, qui servare possit patriam.
Rea:
At amo te!
Aemilianus:
Itaque te abicio.
Rea:
Vin’ me sic vitiare ut tu ipse es vitiatus?
Aemilianus:
Faciendum est necessarium. Italia pascetur nostra infamia, nostra contumelia reconvalescet.
Rea:
At si me amas, istud non postulas.
Aemilianus:
Hoc non postularem, nisi me amares.
Puella virum aspectat horrore perfusa
Aemilianus:
Obtemperabis, filia Imperatoris. Amor tuus est immensus.
Rea:
Obtemperabo.
Aemilianus:
Eris uxor illius.
Rea:
Ero uxor illius.
Aemilianus:
Ergo porrige manum illi fabricatori bracarum, qui est pectore lentissimo
Rea obtemperat.
Aemilianus:
Nunc accepisti manum unicae filiae Imperatoris, Caesar Runcina, et vitulo aureo imposita est corona imperialis. Nam tempore hodierno lenocinium facta est virtus, si comparatur cum sceleribus inauditis, quae inferuntur generi humano.
Caesar Runcina commotus est.
Caesar Runcina:
Principissa, fac credas mihi: Lacrimo sincerissime. Nulla umquam negotiatio universalis ad tantum culmen sublata est ad quantum Runciniana hoc foedere in vitam facto.
Oboriuntur fumi volumina ingentia.
Mavors:
Imperium est servatum!
Zeno Isaurus:
Europa servatast!
Sulphurides:
Canamus oden salutarem, Maiestas.
Zeno et duo camerarii se consistunt more militari.
Idem viri tres:
O Byzantium, gaude et iubila!
Caelum ascendit gloria, fulgor pervenit ad caelum.
Nostra fides, nostra spes
vanae non fuere:
Eia sumus servati.
Caelum ascendit gloria, fulgor pervenit ad caelum.
Nostra fides, nostra spes
vanae non fuere:
Eia sumus servati.
Tullius Rotundus:
Statim desinite comburere archiva!
Voc Achilis:
Ecce Imperator!
Fumus dilabitur, in ianua medius inter aulicos apparet Romulus, post eum Achilles et Pyramus, qui gerit corbem planum. Silentium
Index verborum rariorum recentiorumve
Comoediae pars 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13