Eclectica
 
 
 



Imprimer


RUMOR VARIUS
Anno 1979 - fasciculum 12
Praefatio

.

Ulricus Aeschllmannus amicis suis salutem!

Placuitne vobis exemplar Rumoris Varii, quod superiore mense editum est? Epistula in eo a Patricio Hardmeiero de certaminibus automobilium scripta me certamina huius generis amantem maxime delectavit. Sane puto nuntium de hoc certamine moderno genere scribere auctori opus difficillimum fuisse!
Quomodo - ut exemplum dem - cogitatio rotae automobilis optime exprimitur? "Rota" dicatur an melius "circulus conflatus"? Nescio. Estne quis inter vos lectores, qui mihi discrimen inter verbum "rota" et verbum "circulus" ostendere possit? Significatne "rota" partem interiorem, "circulus" autem quasi curvaturam rotae (1), "circulus conflatus" autem denique anulum, qui e cumme (2) aëre impleta constat? Respondenti iam hodie gratias ago! Cuius responsum si nobis mittetur, in Rumore Vario publicabitur.
Portat ut videtis translatio cogitationum modernarum in linguam Latinam semper in se aliquas difficultates; qua re Patricio Hardmeiero auctori eo magis gratia habenda est, quod a munere sibi praeposito non abhorruit!
Ceterum huic viro et omnibus studiosis Communitatis Academicorum (3), scholae nostrae, pro examine maturitatis modo feliciter sustentato gratulor! Utinam quam plurimi lectorum exemplum Patricii Hardmeieri epistulis nobis mittendis imitarentur! Nam libellus noster sitit iamdudum epistulas manu legentium scriptas.
Praeterea hodie tantum paucis verbis praefationem scribam, ne verba mea, ut iam saepe factum sit, maiorem partem paginarum libelli sumant, praesertim cum tempus alicuius longae epistulae scribendae mihi desit. In schola nostra mihi magna munera suscipienda sunt; quae in tempora futura differre mihi non licet. Mox etiam aderit dies, quo die miles XXI dies et noctes me armis exercere debebo. Scilicet me etiam ex armis praefationem pro libello mensis Maii scripturum esse. Cum et illam praefationem brevem futuram esse necesse sit, spero vos lectores ampliores epistulas publicandas redactioni Rumoris Varii missuros esse, ne libellus noster epistulis egens mense Maio vitam efflet!
Valete!
Ulricus Aeschlimannus

(1) curvatura rotae: Felge
(2) cummis: Gummi
(3) Communitas Academicorum: Akademikergemeinschaft

 
© Editions Eclectica 2006-2009 |  Contact Réalisation NetOpera | PhotOpera