Petrus Royzius Maureus (Hispanice: Pedro Ruis de Moros) saeculo XVIo ineunte in Hispania natus est et anno 1571o in Lituania mortem obiit. In universitate Illerdensi (Lérida) iuri civili atque iuri canonico studuit. Circa annum 1530um Italiam petivit, ubi artem suam perfecit. At anno 1542o ad ius civile in universitate Cracoviensi (Krakau) docendum arcessitus est: Ibi maxime honoratus, in patriam suam numquam rediit.
Cum valetudine non esset firmissima, auxilio medicorum saepe usus est. At cum Musas diligenter coleret, ex experientia sua splendores et umbras huius ordinis cognovit, quas facetis epigrammatis celebravit.
Quorum ecce hoc exemplum:
Indoctus cum sis medicus, cui nulla Galeni
littera, cui notum iota nec Hippocratis,
quid loquor - occidas hominum cum milia multa,
ulla nec a te sit visa venire salus,
insanis an amas? Tyrios indutus amictus
ire audes? Semper coccina ferre iuvat?
Nec venit in mentem, quot tu demiseris orco
milia, quot per te milia in urbe fleant,
quot viduae, quot pupilli sumpsere cucullas,
civibus urbs ploret quot viduata suis?
Te tamen ardentem tyrio iuvat usque lacernam
murice, te semper coccina ferre iuvat?
Pulla iuvent; medicis conchylia linque peritis;
non quadrat medico purpura carnifici.
Pone ergo laetas, age, vestesque indue tristes,
plorantum, infelix, et tege more caput.
Funeribus, quorum multis tu milibus urbem
indoctus comples, convenit ille color.


Ex libello 'De feriis Latinis Nicensibus undecimis', a Clemente Desessard edito.