Amicae et amici nostri haec legentes!

Vere ineunte vobis et imaginem et carmen huic anni tempore grato et iucundissimo aptum propositurus sum:

Ecce gratum
et optatum
ver reducit gaudia,
purpuratum
floret pratum,
sol serenat omnia.
Iam iam cedant tristia!
Aestas redit,
nunc recedit
hiemis sevitia.

Iam liquescit
et decrescit
grando, nix et cetera;
bruma fugit,
et iam sugit
veris tellus ubera;
illi mens est misera,
qui nec vivit,
nec lascivit
sub aestatis dextera!

Gloriantur
et letantur
in melle dulcedinis,
qui conantur,
ut utantur
premio Cupidinis:
simus iussu Cypridis
gloriantes
et letantes
pares esse Paridis!   (Carmina Burana, 143)

In mea patria Berna, quae ursum in signo (1) suo habet, id animal, quod multis locis orbis terrarum imprimis puellis et pueris gaudium maximum affert (num quis ignoret ursulum lusorium nostra lingua "Teddybär" appellatum?), plurimi aestimatur. Bernae et in fossa ursorum et in vivario ursi vivunt, coluntur, educantur.

Mos est tempore vernali ursulos, qui anno superiore circiter diebus natalibus nati sunt, primum in publicum prodire. In nostra imagine unus ex tribus ursulis die 21^o mensis Decembris anno praeterito natis cum matre, ursa Turcensi (2), cui nomen est Yedi, primam ambulatiunculam extra stabulum sub caeli axe suscipit.

In carmine autem, quod in ea praeclara anthologia XII saeculi, cui nomen "Carmina Burana", invenitur, non de ursis, sed de laetitia maxima reditus veris, quae homines commovet, cum hieme severa digressa rerum natura revirescit, agitur. Ceterum componista celeberrimus Carolus Orff inter alia hoc quoque carmen pulcherrime musicis modis aptavit (3) in illo opere, cui titulum "Carmina Burana; cantiones profanae cantoribus et choris cantandae comitantibus instrumentis atque imaginibus magicis".

Sint vobis et imago ursuli cum matre et carmen signa atque omina veris revertentis et vires recentes bonumque animum vobis praebentis ad omnes res novas incipiendas, quas perficere in animo vobis est. Quidquid agitis gaudentes omnibus, quae rerum natura revirescens praebet, velut hilaritate, sole, variis floribus, avium cantibus, amore, vobis contingat!