Egregii legentes,

Die XVI mensis Maii collegae Rumorem Varium edentes sessiunculam nostram annuam Turici in aedibus AKADis habuimus. Quo in conventu aderant socii nostri Dr. Emanuel Bernard Rüschlikonensis, Dr. Guarnerius Fridericus Ebel(ius) Berolinensis, Danielis Weissmann Bernensis, Barbara Maier Brunnensis, Dr. Georges Durtschi Maurensis, rector scholae AKADis, qua Rumor Varius semper subsidiis alitur, et ego, qui omnes ad sessiunculam ineundam invitaveram.
Hoc conventu nonnullas res maximi momenti tractavimus: Primum amicam nostram Barbaram Maier, quam doctissimam et eruditissimam auctricem permultarum symbolarum adhuc Rumore Vario divulgatarum optime novistis, magno applausu omnium, qui aderamus, collegio redactorum inscripsimus. Deinde ab AMICO allocutione eius Latine prolata "De cohortibus praetoriis Helvetiis Francogallicis" maxime gavisi sumus. Qua oratione audita decrevimus, ut libello futuro publicaretur, fortasse illo, quem extra ordinem solitum ad instans anniversarium decimum Rumoris Varii celebrandum primis mensibus anni proximi edere in animo habemus. Praeterea cetera consilia cepimus; promisit autem AMICUS se nuntium Latinum de his consiliis velut de tota sessiuncula habita scripturum esse. Quem in proximo libello legere poteritis; ego autem de hoc conventu nihil amplius addam nisi hoc unum: conventum peractum finivimus in caupona Oerlikonensi, poculantes, vino dulci gaudentes!

Quid novi in hoc libello? Vertite paginas, videte, gaudete varissimis symbolis propositis! Curate, ut semper valeatis! Felices ferias aestivas vobis! Cordialiter vos saluto.

Dabam Turici, die XVI mensis Maii a. MCMLXXXVII