Cari legentes

Libello, quem manu tenetis, et Rumoris Varii tomus IX et series libellorum hoc anno editorum perficiuntur. Cum autem dies natalis Christi adventurus sit, vobis hac praefatione duos nuntios facio: Primum vobis gratias ago, quod etiam hoc exeunte anno Rumori Vario fidem praestabatis; deinde vobis pro toto collegio redactorum vota exprimam, ut felicem diem natalem Christi felicemque novum annum MCMLXXXVII celebretis! His votis tria alia addam: Primum, ut pax tandem inter homines in omnibus regionibus orbis terrarum bello vexatis restituatur; secundum, ut pax, ubi adhuc regnat, servetur; tertium, ut toto orbe terrarum homines aegrotantes sanentur, fame sitique cruciati tandem perpetuo cibo necessario aquaque recreentur.

Sit vobis novus annus ineundus felix, faustus, fortunatus! (Sit Rumor Varius et toto anno MCMLXXXVII in numero amicorum vestrorum!).