Cari legentes,

Epistulam nuper a Magno Moser in vico Düdingensi (Düdingen, Kanton Freiburg) habitante accepi. Qua nuntiavit se magistrum discipulos linguam Latinam docentem esse. Epistulae iocos VIII addidit, quos origine Germanicos a discipulis in sermonem Latinum verti iusserat. Quam bene discipuli munus sibi propositum solverint, facillime intellegetis, si eorum conversiones in hoc libello sub titulo "Facete lepideque dicta" legeritis. Cuius generis fabulae maxime dignae videntur, quas publicemus in Rumore Vario! Gaudeo, quod preces meae — prioribus libellis saepius repetitae! — non modo aures legentium intraverunt, sed quasi semina patienter sata fruges gratissimas proferre incipiunt!

Iterumque vos oro, cari legentes, ut hoc exemplum a discipulis Düdingensibus statutum imitemini! Mittite nobis fabulas alacres Rumore Vario publicandas. Ita efficietis, ut libellus noster semper cuique legenti aliquid ferat, ex quo legendo voluptatem capiat.