RUMOR VARIUS
Anno 1982 - fasciculum 37
.
Praefatio
.
Cari legentes,
Paucis diebus ante accepi epistulam a nostro socio Prof. Florindo Di Monaco ex oppido Italico nomine San Prisco scriptam. Cuius nuntium vobis, cari amici Rumoris Varii, libenter transferam. Nuntiat enim Florindus litteris illis:
- "…Cum magis magisque in studia Latinarum litterarum incumbam libentissime, mihi placet Te certiorem facere me exeunte anno MCMLXXXI magna laude honestatum esse in XXIV Certamine Vaticano praesentique anno nomisma aureum meruisse in Certamine, quod Academia Vergiliana, Mantuae constituta, sollemniter indixit ut celebraretur bis millesimus annus ab obitu summi vatis Latinitatis; nuperrime autem laude quoque decoratus sum in certamine Catulliano, quod singulis annis Veronae celebratur.
- Nunc spero Te benigne accepturum esse duo carmina mea modo perfecta; prius inscribitur "Nox hauaiana" et paucis versibus celebrare vult amoenissima mirificaque loca in Oceano Pacifico sita — i.e. Insulae Hauaianae (1) — alterum carmen, cui nomen "Amantes" dicatum est omnibus amantibus, sollemnia quorum in Italia celebrantur postridie Idus Februarias, i.e. dies festus Sancti Valentini.
- Precor ut Tibi valde placeat experimenta mea edere in proximis Rumoris Varii exemplaribus. Omnia simul faustissima accipe ut semper libellus Tuus augeatur abundeque floreat iterum iterumque…"
Ad haec "Gratias, care Florinde" respondeo et "gratulamur Tibi cuncti socii Rumorem Varium edentes et ego, cui hac praefatione praeconem laudum Tuarum esse licet! Libenter Tua carmina praesenti futurisque libellis edemus, etiamsi — imprimis tironibus linguam Latinam discentibus — fortasse non semper facilia cantu sint propter formam metricam in scholis Helveticis minus saepe instructam."
In hoc libello, cari legentes, invenietis non solum Florindi carmen, quod "Nox hauaiana" inscribitur, sed etiam alias ratas partes forma poetica vel prosaica Latine composita lectuque dignissima! Si vos ipsi opera Latine composita habetis, quae, ut Rumore Vario publicentur, digna censeatis: mittite nobis publicanda! Nam noster libellus vivit, ut scitis, e varietate ratarum partium, quas legentes nobis mittunt.
Valete!
Udalricus Aeschlimann
Udalricus Aeschlimann
(1) Insulae Hauaianae: Hawaii