RUMOR VARIUS
Anno 1980 - fasciculum 23
.
P. S.: Addam, quae vestra sine dubio intersint: multi loci, quos in serie a Patricio Hardmeier de legibus XII tabularum publicata invenitis, ex operibus Auli Gelli excerpti sunt.
Praefatio
.
Ulricus Aeschllmannomnibus legentibus salutem dicit!
Tandem advenit aestas, cari amici, quo tempore plerique vestrum, dum feriae manebunt, rusticatum abibunt (1). Iamne deliberavistis, quos libros his proximis feriis legendos in itinere vobiscum portaturi sitis? Certe amicum vestrum Rumorem Varium portabitis, sed viginti paginae huius libelli fortasse non suppetent ad legendum, cum feriarum tempus longum sit! Longissimi autem sunt temporibus feriarum dies pluvii, qui, ne vobis pleni taedii fiant, optime aliquibus libris iucundis legendis a vobis degentur.
Nuper tales libros iucundissimos novi, quos vobis legendos commendo: scripsit Aulus Gellius titulo Noctes Atticae XX libros, in quibus de multis rebus ad varias disciplinas pertinentibus disseruit. Hic auctor, cum circiter anno CXXX p. Chr. natus sit, proposita in his libris tanta alacritate tractavit, ut putares hos libros nostris temporibus scriptos esse! Sunt autem Noctes Atticae faciles lectu, quod Auli Gellii genus scribendi etiam iis, qui linguae Latinae nondum periti sunt, iucundum videatur.
- Vobis capitulum quintum decimum libri tertii ante oculos ponam, ut melius intellegaits, quae sit mentio mea:
- Exstare in litteris perque hominum memorias traditum, quod repente multis mortem attulit gaudium ingens insperatum interclusa anima et vim magni novique motus non sustinente.
Cognito repente insperato gaudio exspirasse animam refert Aristoteles philosophus Polycritam, nobilem feminam Naxo insula. Philippides quoque, comoediarum poeta haud ignobilis, aetate iam edita, cum in certamine poetarum praeter spem vicisset et laetissime gauderet, inter illud gaudium repente mortuus est. De Rodio etiam Diagora celebrata historia est. Is Diagoras tres filios adulescentes habuit, unum pugilem (2), alterum pancratiasten (3), tertium luctatorem (4). Eos omnes vidit vincere coronarique Olympiae eodem die et, cum ibi eum tres adulescentes amplexi coronis suis in caput patris positis saviarentur (5), cum populus gratulabundus (6) flores undique in eum iaceret, ibidem in stadio inspectante populo in osculis atque in manibus filiorum animam efflavit.
Praeterea in nostris annalibus scriptum legimus, qua tempestate apud Cannas exercitus populi Romani caesus est, anum matrem nuntio de morte filii adlato luctu atque maerore affectam esse; sed is nuntius non verus fuit, atque is adulescens non diu post ex pugna in urbem redit: anus repente filio viso copia atque turba et quasi ruina incidentis inopinati gaudii oppressa exanimataque est.
Nonne sunt iucunda haec verba ante MDCCC annos scripta? Tali modo sunt nonnulla cetera capitula in Noctibus Atticis ab A. Gellio scripta.
Qua de causa omnibus, qui, quid temporibus feriarum legant, nesciunt, iterum suadeo: praeter Rumorem Varium interdiu aliqua capitula ex libris, quos A. Gellius titulo Noctes Atticae de variis rebus iucundis scripsit, legatis! Ita non modo dies pluvios feriarum vestrarum breviores, sed etiam scientiam vestram linguae Latinae ampliorem efficietis!
Felices ferias aestatis omnibus! Curate, ut valeatis!
Ulricus Aeschlimann
P. S.: Addam, quae vestra sine dubio intersint: multi loci, quos in serie a Patricio Hardmeier de legibus XII tabularum publicata invenitis, ex operibus Auli Gelli excerpti sunt.
(1) rusticatum abire: sich in die Sommerfrische begeben
(2) pugil, -ilis m.: Faustkämpfer
(3) pancratiastes, -ae, m. : Allkämpfer
(4) luctator, -oris, m.: Ringer
(5) savior, -atus sum 1.: küssen
(6) gratulabundus, -a, -um : sich in Glückwünschen ergehend
(2) pugil, -ilis m.: Faustkämpfer
(3) pancratiastes, -ae, m. : Allkämpfer
(4) luctator, -oris, m.: Ringer
(5) savior, -atus sum 1.: küssen
(6) gratulabundus, -a, -um : sich in Glückwünschen ergehend