Pugna pro futura forma regni Persarum toto in mundo omnium oculos animosque ad se convertit. Aliquando Schah Reza Pahlevi "cum mortuus ero", inquit "populus meus per longa tempora reminiscetur me illum ducem fuisse, qui regnum Persarum ex aetate media in tempus modernum duceret!".

Reapse profectio Persarum in tempus modernum anno MCMLXIII inita est, nam eo anno maxima pars Persarum plebiscito "revolutionem albam" a Schah declaratam approbaverunt. Nunc adversarii profectioni finem fecerunt; instat "revolutio nigra". Quae regnum Persarum in aetatem mediam reducere possit. Schah Reza Pahlevi et Ayatollah Khomeini - homo potius religiosus quam politicus - iterum acerrimo proelio inter se certant: Ayatollah Khomeini anno MCMLXIII a Schah victus nostro anno MCMLXXIX fortasse victor erit. Sin autem Ayatollah ex hoc proelio victor abierit, is autokratiae, qua Schah Reza regnum suum in quoddam imperium populis Asiae timendum vertere voluit, finem faciet et vir religious theokratiam constituet, cui signum mentis suae progressui et advenis oppositae imprimet.

Tertius actor in hac tragoedia Persarum est Schahpur Baktiar, qui a Schah Reza caput regiminis designatus est. Is autem non amicus designatoris sui esse putatur, quod brevi tempore ante quam caput regiminis designatus est, designatorem suum cum Hitlero comparari posse dixerat. Verisimile est hoc novum caput regiminis futuro receptui sui designatoris e re publica providere.

Sed nihilominus Khomeini amicus capitis novi regiminis esse putatur, quia Schahpur Baktiar amicus civitatum in Europa et in America sitarum esse putatur, et quia democratiam in regno Persarum constituere velit. Baktiar sperans Khomeinium sibi pacando regnum auxiliaturum esse auctoritatem eius in angustis finibus coercere velit. Regnabitne apud Persas denique autocratia aut theocratia aut democratia? Poteritne Schahpur Baktiar veram democratiam in sua patria constituere?

Terra Persica opibus in terra inclusis multis magnis rebus publicis maxime interest. Quam ob rem - miserabile dictu - non dubitandum est duces harum rerum publicarum se rebus publicis Persicis ea mente interposituros esse, ut e praesente bello suis civitatibus quam maxima commoda capiant. Vera democratia autem in regno Persarum institui non potest nisi a forti duce et a populo Persico ipso omni interventu ducum externorum omisso constituitur. Futura tempora monstrabunt, num Schahpur Baktiar hic dux sit, qui Persis nullis ducibus externis se interponentibus rem restituere possit. Schah Reza Pahlevi, cum adhuc fuerit dictator, tamen patriae Persarum quaedam commoda praebebat, inter quae solum hoc unum enumerem: Et auctoritate sua et exercitu strenuo semper impediebat quominus externae res publicae rerum Persarum potiri possent.