Si valetis, bene est, ego valeo.
Superiore mense in hoc libello sententiam unius amicorum nostrorum divulgavi, qui res graves in nostro libello amplius respici velit. Ego hodie vobis ostendere velim, quomodo hoc desiderium non modo a me, sed etiam a vobis omnibus in factum verti possit.

Vertendo paginas invenietis epistulam ad hodiernum statum rei publicae Persarum pertinentem. Originem sententiarum in hac epistula publicatarum in aliquo libello Germanorum lingua scripto inveni. Excepi sententias gravissimas et eas in Latinam linguam transtuli. Ceterum vos certiores facere velim me in proximo libello hanc epistulam de rebus Persarum perrecturum esse.

Spero vos his litteris legendis eas famas melius perspecturos esse, quae omni die ad nostras aures perveniant sive sint nuntiatae machina radiatili (1) sive commentariis scriptis sive machina televisoria (2). Opto ut etiam nonnulli vestrum me imitari temptaturi sint, nam vobis haud ignotum est nostrum libellum ratis partibus vestra manu scriptis semper carere! Mittite nobis quam plurimas ratas partes scriptas!

Felicem novum annum vobis!