Quicumque hunc commentarium, qui hodie primus in aedibus Acadis distribuitur, legerit "tandem, tandem editus est" dicet gaudebitque hoc antiquum consilium, de quo tam diu in schola disputatum fuerit, tandem in factum versum esse!

Variae erant difficultates, quibuscum nos editores pugnabamus antequam haec prima editio huius commentarii distribui potuit. Nam — deplorabile dictu! — primum perpauci modo discipulorum quaestioni de nomine aptissimo istius commentarii responsum dederunt; deinde nobis editoribus tempus commentariorum scribendorum diu deerat; postremo cupiditas scribendi — confitemur! — saepe nos reliquit.
Sed nunc tandem factum est initium. Ergo gaudeamus, studiosi!

Inter eos, qui quaestioni nostrae responderunt, maximi putant optimum titulum commentariorum nostrorum, qui singulis mensibus temporibus futuris distribuendi sint, esse "Varium Rumorem". Ergo — secundum illud proverbium antiquissimum: vox populi vox Dei — liceat ei nomen "Varius Rumor" dari. Omnibus responsis vestris gratiam agimus!

Initium est factum, ut supra diximus; nunc speramus quam plurimos vestrum pro exemplari secundo, quod mense Martio vel mense Aprili distributum futurum sit, quam plurima articula scripturos esse.
Tempus semestre hodie initium vobis felix faustumque sit!