Cari amici Rumoris Varii,

ut in libello mense Octobri edito legere potuistis, redactorum collegium me novum collaboratorem creavit. Nescio, quam ob rem honorem hunc maximum meruerim. An versuli mei contra omnes metricae artis leges compositi tantopere placuerunt? Sed ne diutius meditemur de discrimine alti illius collegii! Qualis autem sit novus redactor, quid agat eo tempore, quo non Rumori Vario operam dat, quaeque futuris temporibus in nostro libello scripturus sit, nunc accipiatis:

Natus sum eodem anno, quo Sovietici primi homines satellitem artificum in spatium miserunt, anno enim MCMLVII. p. Chr. n. vel MMDCCIX. a.u.c. Ut Lucernensi origine et catholica fide, ita Bernensi lingua, habitu et celeritate sum. Bernam, quam urbem non modo Helvetiae, sed etiam totius orbis terrarum pulcherrimam iudico, adhuc numquam nisi feriis relinquebam. Qua sum natus, qua gymnasium pererrans linguam coepi amare Latinam, qua nunc ipse magister factus discipulos in eiusdem pulchritudines introducere conor. Praeter scholam etiam universitatem visito, alteram, ut doceam, alteram, ut docear.

In rebus politicis conservare revolvendo praestare existimans adversarius sum illorum hominum, qui vetera falsa arbitrantes omnia salutem quaerunt in disciplinis et divina et humana violantibus iura. Itaque a me, cari lectores, non modo carmina Matteriana aliaque eiusdem generis linguae Latinae adaptata exspectate, sed etiam commentarios de rebus seu rem publicam seu humanam societatem tangentibus compositos. Non sine studio et ira scribam, sed meas legetis opiniones. Quae utinam vos ita sollicitent, ut ipsi stilo manibus capto aut consentiatis aut acerrimis (sed Latinis!) verbis me vituperetis. Quam plurimae epistulae Rumori Vario missae mihi gaudio maximo erunt, quia, ut iam saepe pronuntiabat Ulricus Aesciilimannus, modo florere potest libellus noster, si et vos ad florendum contribuitis. Spero vos me contentos fore! Valituros vos omnes esse cupit novus redactor